7 deadly sins

الخطايا السبع لقتل مشروعك

انت عارف ان انت ممكن تكون السبب في فشل مشروعك؟

ايوه ماتستغربش

لان فعلا من خلال عملي كأستشاري تطوير اعمال وجدت ان معظم مشاكل و اسباب فشل الشركات بيكون سببها اصحاب الشركه نفسهم

طب ايه هما ال7 خطايا اللي بتتسبب في فشل الشركات

الخطيئه الاولي- القلق

طبعا لازم تقلق علي مشروعك و تكون خايف من الخساره لكن فيه قلق صحي و قلق مرضي

والقلق اللي اقصده اللي بيخليك تتصرف غلط و تبدا تضغط علي فريق العمل وتبطل بحث علي حلول منطقيه لتطوير مشروعك

الخطيئه الثانيه - اللامبالاه

من اكتر الخطايا قتلا لمشروعك لما مايكونش عندك حماس ولا خطوات انت ملزم نفسك بيها تجاه مشروعك

الخطيئه الثالثه- الحماس الوقتي

طبعا الحماس مهم لكن لازم يكون الحماس ده دائم مش مجرد حماس لحظي و صلاحيته قصيره . لازم يكون عندك سبب انت عايز تحققه من مشروعك

الخطيئه الرابعه- الملل

الملل قاتل . ده اكيد لكن الوضع مختلف مع المشاريع لان اي مشروع لازم بمر بعده منحنيات منها النجاح و منها كمان الاخفاق ولما منحني مشروعك يهبط للاخفاق بلاش تشعر بالملل لان ده طبيعي في رياده الاعمال و اللي لازم تعمله في الوقت ده انك تفكر في تجديد موارد و اتجاهات مشروعك التسويقيه

الخطيئه الخامسه- السيطره الوهميه

احساس انك مسيطر علي كل الامور و قادر تدير مشروعك ده مهم جدا لكن الاهم ان احساس السيطره ده مايكونش احساس وهمي و تكون قادر فعلا تحلل مشروعك و تعرف اسباب الخلل و الاخفاق و كمان تقدر تحدد مسؤليه كل فرد في شركتك و الاهم انك تكون قادر علي اتخاذ القرارات المصيريه

الخطيئه السادسه - الاسترخاء

مش معني انك صاحب شركه انك ماتلزمش نفسك بتارجت ولازم تحققه

الموضوع لازم يكون جد و تكون فعلا عارف تدير فريق عمل و تقدر تحمسهم و كمان تحاسبهم . بلاش تراخي ولا استرخاء

الخطيئه السابعه- الثقه الزائده

الثقه مهمه جدا سواء في نفسك او في قراراتك او حتي فريق عملك لكن في نفس الوقت لازم تحلل كل الامور دي كل فتره بسيطه و تشوف انت فعلا ماشي صح في مشروعك

هل انت فعلا ماشي في الاتجاه السليم لتحقيق رؤيتك

هل فريق العمل اللي معاك فعلا بيحقق المطلوب منهم

حقيقي 95% من فشل الشركات بيكون سببها اصحاب الشركات نفسهم

حاسب نفسك دلوقت وشوف انت فعلا بترتكب كام خطيئه من الخطايا السبع القاتله